-Хурга хурга чи яагаад
Хундан цагаан болсон юм бэ?
-Цасны сүүлчээр төрсөн юм чинь
Цагаан болох нь аргагүй биз ээ
-Ишиг ишиг чи яагаад
Хадган цэнхэр болсон юм бэ?
-Цэлмэг өглөө төрсөн юм чинь
Цэнхэр болох нь аргагүй биз ээ
-Тугал тугал чи яагаад
Зосон улаан болсон юм бэ?
-Ургах нарнаар төрсөн юм чинь
Улаан болох нь аргагүй биз ээ
-Унага унага чи яагаад
Хилэн хар болсон юм бэ?
-Харанхуй шөнө төрсөн юм чинь
Хар болох нь аргагүй биз ээ
-Ботго ботго чи яагаад
Алтан шаргал болсон юм бэ?
-Шаргын говьд төрсөн юм чинь
Шар болох нь аргагүй биз ээ